ওবিসির দাবীল নিখিল বিষ্ণুপ্রিয়া মণিপুরী মহাসভা লালফামে

কেন্দ্রীয় ওবিসিত নাং কাকরানির দাবীল নিখিল বিষ্ণুপ্রিয়া মণিপুরী মহাসভা লালফামে লামেসি। মহাসভার বারাদেত্ত স্বপন সিংহ গিরকে মাতলতা গেলগা ২৯ ডিসেম্বর লেইপাকপার দিনে মহাসভার প্রতিনিধি দলআহান ডাংরিয়া মুখ্যমন্ত্রী সর্বানন্দ সোনোয়ালর লগে দেখা করিয়া স্মারকলিপি আহান দিয়া আমার জাতর নানান দাবী দাওয়া জানেইলা। ঔ প্রতিনিধি দলহানাত রাতাবাড়ির ডাঙরিয়া বিধায়ক বিজয় মালাকার গিরকৌ আসিল। অহানর থাংনাত হেমন্ত বিশ্ব শর্ম্মা গিরকর লগে উনা ইয়া সামাজর কথা বারো ওবিসিত আমারতারে য়ৌকরানির বারে মাতলা।

মুখ্যমন্ত্রী বারো হিমন্ত গিরকে আমার দাবী অতা পুরন করে দিতৈ বুলিয়া আশ্বাস দিল আরো এপাগারকা লালফামহান খানি খামকরিয়া থনা অইতৈ।
মাতানি থক ওবিসির দাবি এহাল ২৮ ডিসেম্বরত্ত গুয়াহাটিট ‘সচল’ ধর্নাথলে মহাসভা অবস্থান ধর্মঘটে বহিসিলা। ২৯ ডিসেম্বরে দাবী পুরনর আশ্বাসহান পেয়া এপাগারকা লালফামহান খানি খামকরিয়া থনা অইল।