টি-২০ সিরিজর ২য় খেলাহান : বিরাটর পরল্লেই ব্যাটিংল ভারতে ৭ উইকেটে জিঙলা

ভারত বনাম ইংল্যান্ড ২০২১ টি-২০ সিরিজর ২য় খেলাহান, নরেন্দ্র মোদী স্টেডিয়াম, আহমেদাবাদ, গুজরাট

সিরিজর পয়লাকার খেলাত হারনিয়ে আজিকার খেলা এহান ভারতরাঙ জবর গুরুত্তপূর্ণ ইসিল অহান ভারতর দলহান বাসলা অহতই হারপিলাঙ। টসে জিঙিয়া ভারতরে ব্যাটিংরকা দিয়া পেঠেইলা। অকরাহান ইংল্যান্ডরতা অত্তামাই হবা নাইসিল। শূন্য আতে জস বাটলার আলুইয়া আহিল। অতার পিসেউ থাঙনাকার উইকেটগত জেসন রয় ও মালানে থেপ করিয়া উবা ইলা। দিয় গিয়ে ৬৩ রান তিলকরলা। নিজর ২৪ রানর সময়ত চাহালর হবা বল আগত মালান আলথক অইল। হবা ব্যাট করিয়া জেসন রয় ৪৬ রানর সময়ত আলুইল।
অতার পিসে জনি বেয়ারস্টো আউট ইল ২০ রান করিয়া। লমানির অহানদে চিঙপা মরগানর ২৮ বারো বেন স্টোকসর ২৪ রানল ইংল্যান্ডে ৬ উইকেট মাঙকরিয়া ১৬৪ রানর জলা করলা। জু‌ৱাপে ব্যাট করাত লামিয়া লোকেশ রাহুল ৬ভল খেলিয়া ০ রানে আউট ইল। পিসেদে আজি নু‌ৱাগ টি২০ লামিসিল ইশান কিশান বারো দলচিঙপা বিরাট কোহলির হবা ব্যাটিঙল ভারত জিঙানির পথে গেরাগা। পয়লাকার ম্যাচহাতই আজি ইষান জবর মারিয়া খেলিয়া হুদ্দা ৩২ বল বারিয়া ৫৬ করল।

অতার পিসে কোহলি বারো পন্তর জুরাহানে বৌবরনর অসারে বারানি অকরলা। ৩৫গ বল খেলিয়া য়্যাঙ্খেই করল কোহলিয়ে। হের বারাদে ১৩গ বলন ২৬ রানর পরল্লেই ইনিংস আহান খেলল পন্ত-এ। বিরাটে দলহানরে জিঙুয়া দিল লগে আন্তর্জাতিক টি-২০ত পয়লাকার ব্যাটসম্যানগ হিসেবে তিন লিশিঙ রান পুরা করল। ভারত দলচিঙপাগই লমানি পেয়া ৭৩ রানে না মরিয়া আসিল।

Source: দৈনিক ইত্তেফাক